Манай сургуулиас зохион байгуулсан “ОЮУТАН МИНИЙ НҮДЭЭР” сэдэвт эсээ бичлэгийн болон гэрэл зургийн уралдаанд сэтгүүлзүйн арав гаруй сургуулийн 30-аад оюутан оролцож, шалгарагсад 12 дугаар сарын 8-ны өдөр шагналаа гардаж авлаа.        

    МУИС-ийн УЗА-сэтгүүлзүйн 2-р курсын оюутан У.Бямбаням “Хатдын нулимс хаадын хормойд унадаг” сэдэвт эсээгээр тэргүүн байр эзэлж өргөмжлөл жаран мянган төгрөг гардан авсан бол удаах байрыг Хэвлэлийн хүрээлэнгийн дэргэдэх “Сэтгүүлч” коллежийн 4-р курсын оюутнууд болох Х.Өнөрсайхан “Хөшиг хаагдахад хүчирхийлэл эхэлнэ”,  Г.Ариунзаяа “Эмэгтэйчүүд хэвлэл мэдээллийн хэрэгслээр...” сэдэвт эссээгээр удаалж, тус бүр өргөмжлөл, дөчин мянган төгрөгөөр шагнууллаа.      

            Хэвлэлийн хүрээлэнгийн дэргэдэх “Сэтгүүлч” коллеж үүсгэн байгуулагдсаны 5 жилийн ойн арга хэмжээний хүрээнд сэтгүүл зүйн дээд боловсрол олгох тус сургуулийн сургалтын онцлог, имижийг тодотгон харуулсан телевизийн 20 минутын баримтат киноны шилдэг зохиол шалгаруулах бүтээлийн уралдааныг  2009 оны 10 дугаар сарын 26-наас 2009 оны 12 дугаар сарын 30-ныг хүртэл  мэргэжлийн сэтгүүлчдийн дунд зарлаж байна.  Хэвлэлийн хүрээлэн болон "Сэтгүүлч"  коллежийн ахлах ангийн оюутнууд, нийт ажилтан, төгсөгчдийн хувьд энэ уралдаан нээлттэй.

Сэтгүүлзүйн бакалаврын зэрэг олгох “Сэтгүүлч” коллежийн хамт олны сургуулийнхаа 5 жилийг ойг тохиолдуулан 2009-2010 оны хичээлийн жилд төлөвлөсөн бүтээлч ажлуудыг тус сургуулийн Удирдах зөвлөлийн гишүүд 10 дугаар сарын эхээр сайшаан баталснаар уг төлөвлөгөөний эхний ажлууд амжилттай хэрэгжиж байна.

Сургалтын алба, Оюутны зөвлөлөөс хамтран зохион байгуулж буй сурлага, хариуцлага, урлаг спорт, суралцах орчин зэрэг дөрвөн зорилт бүхий “Оюутны бүтээлч аян”-ы эхний үр дүнгүүд гарч байна. Мэргэжлийн хичээлийн явцад оюутнуудын боловсруулж бэлтгэсэн бүтээлүүд багш нарын шалгаруулалтад орж байна. Сэтгүүлзүйн дээд боловсрол олгох мэргэжлийн стандартыг шинэчлэн сайжруулах асуудлыг бусад их, дээд сургуулийн эрдэмтэн багш, БСШУЯ-ны Мэргэжлийн боловсролын газрын мэргэжилтнүүдтэй хамтран ярилцахаар бэлтгэж байна.